一年一度的香港電影金像獎頒獎典禮已經播出。雖然過去兩年金像獎由亞視製作，不過今年及明年的投標結果則是由無線投得。是次無線製作不過往年要延遲播出，並就廣告方面作出部份協妥，到底最終製作出來的款式又是怎樣？
今年金像獎比起去年來說，最大的分別就是廣告較去年亞視製作多了一倍，不過每隔廿多分鐘才一節廣告而言，已算是比無線本身的廣告密度調低了。
可是，在跟亞視辦時相若的時間下，結果整個節目予人「趕頭趕命」的感覺。奇怪的是，頒獎禮開始詹瑞文頒獎時廢話連篇，可是此後很多無論是上台頒獎又好，得獎講感受又好，都仿如不停地要趕著一樣。而電視製作看來對於流程勝於一切，終於在頒發最佳兩岸華語電影獎項便出了事。
最佳兩岸華語電影由台灣電影《那些年，我們一起追的女孩》奪得，可是當導演九把刀仍想談及感受時，背景卻已播出佈幕說邀請陳可辛先生來頒發下一個獎項，場面極為尷尬。
另一個發現的是，根據「講。鏟。片」情報人員在樓座所見，製作人員發出的聲音十分大，有時比起現場台上的聲音還要大聲，這是去年所沒見的。
其實，頒獎禮超時十分常見，去年亞視寧可延長時段，可是無線卻只會容許延長一、兩分鐘，弄得頒發最終的最佳電影獎項時，仿如落雨收柴一樣。而其他環節在時節不足下，悶場亦十分明顯。
觀乎整體情況，雖然無線過去兩年沒製作金像獎，但是看來看不到人家製作的一些優點，反而繼續自家的一套甩漏，實在令人對於明年的製作難以再有信心。
tommyknchan
對！今次金像獎失誤實在太多，太多數嘉賓的表現離了題，不能盡錄 (好看的只有黃秋生、甘國亮等人，李玟、陳岑兩人、詹瑞文等等的更是災難)。流程中看似有太多溝通上的問題了。
PS: 梁家輝的部分沒播片段實屬非戰之罪，但已經搞壞個show。
可以說是近年來最難看的金像獎典禮。
既然如此，下年倒不如交回亞視做，才是上策吧？
Keung
第一 製作不是無線做 只是轉播
製作是獨立製作公司 只是producer無線出身同重做梗tvb遊戲節目
否則D camera會有tvb logo同工作人員著tvb t-shirt
而且今年now香港台都有播 無線是不會製作任何節目有機會要交片比其他台播放
消息指連爭取賽馬收費電視都唔肯將晨操片段交比亞視
第二 如果年年超時 不如直接在標書要求多D時間
而且晚間新聞延播要同廣管局交代
第三 overrun其實無線要賠錢比廣告商
鄭裕玲在電台節目話有一年要賠千幾萬
第四 亞視根本是因為無廣告 本身無節目先可以搞到0節目時間控制
這些根本不是人家製作的一些優點
人地奧斯卡都嚴格控制得獎者講感言時間 否則就播音樂
而且之前2年是因為亞視有台灣投資者先有錢投
宜家應該無啦
而且在無線播有31點 在亞視播只有11點
無線年年對準大結局連環炮
選擇一個多人看的平台都是尊重得獎者的一個方法
而且散文都說下年都是無線投得 請tommyknchan請你看清楚
Lau
真係唔多掂……
本來今年既提名名單戰況近年來最激烈，今屆個舞台仲整到好華麗，應該好有睇頭，點知個氣氛仲悶過上屆……今年主辦單位進步左既係加左得獎者拎獎時既介紹旁白，改變左出場音樂？
無線今年肯現場直播改善左，不過做呢類節目要預多時間，今年咁尷尬就知出左事啦！仲有李雲迪做緊個人騷？銀幕段片都播晒仲彈緊琴？其實唔知大家覺唔覺今年個場面冇乜溫暖場面，除左許鞍華、葉德嫻、盧海鵬三幕，劇院裏幾乎消失左種例如《天水圍的日與夜》《歲月神偷》贏獎時觀眾席傳出黎既歡呼聲，只係得劉德華歌迷、影迷不停既尖叫聲，大多掌聲都唔熱烈，好冷清。
根住見到劉青雲眼白白輸比表現平凡既劉德華時熱淚盈眶個樣，《讓子彈飛》大熱倒灶，編劇可以拱手讓俾劇本簡單既《桃姐》？搞到《桃姐》本來拎最佳電影實至名歸，但班觀眾已經好似冇心機，覺得幫得太出面，睇到我都好心嗡。最後唔播提名名單其實個氣氛都衰退緊，因為當片段播放到某部分現場觀眾支持既候選電影會寄予掌聲同喝采聲，直接頒就全場靜晒。
曾志偉同曾寶儀顯然比之前於金馬獎擔當司儀既表現遜色左，金馬獎時兩人妙語連珠勁多互動，係太多司儀拖沓父女自由發揮？為左遷就楊穎所以降低水準？得啲頒獎嘉賓夾硬撐起成個節目，真係覺得佢地唔知點算。
Chan
無線真係好冤枉,那些年九把刀一段明顯係製作單位cue錯,因為那些年得獎時,九把刀已講過野,但九把刀好不識趣地要逐個演員講兩句.大佬,最佳電影都唔會咁做啦.仲要曾寶儀逐個逐個介紹出場,到陳妍希講話時,曾寶儀係話”最後,女神”,所以陳妍希講完後就cue左布幕介紹陳可辛出場,根本係溝通出錯.而且,無線係唔止overrun一兩分鐘,而係十五分鐘.我都知大家都一貫地磨拳擦掌等住入無線罪.但都唔該入位入得正確.
p.s.文化中心一樣過12點就要罰錢,去到11:40仲完唔到,大會當然要快催完結.