不是個個香港人，尤其年輕的，也認識羅拔迪尼路（Robert De Niro）。因此，有人將他形容成荷里活周潤發。羅拔迪尼路現年七十三，七四年《教父續集》（The Godfather：Part II）時，周潤發剛出道。算起來，羅拔迪尼路還大了一輩。
星途是有點相近。全盛期，羅拔迪尼路跟馬田史高西斯（Martin Scorsese）的合作，幾齣黑幫電影，就似周潤發與吳宇森。上了神枱後，最具代表性的作品，是「非常外父」系列，由黑道大佬變身冷面笑匠。到近期的兩齣「無限耆」，簡直回春，昇華到另一層次。這一境地，我們的發哥還未去到。因為，他最近期的作品，只叫《賭城風雲》。
看《賭城風雲III》製作特輯，最震撼的，是周潤發一句：「賭神在觀眾心目中有光環，我們不想破壞。」吓？唔想破壞都搞成咁，想破壞咪世界末日？我好記得睇完第一集《賭城風雲》，非常唔明白點解要將周潤發的角色石一堅寫到小丑一樣。有人答我，可能大陸市場喜歡呢。我當時不同意，大陸人也是看《賭神》長大，也愛看，口味真係獨沽一味只有胡鬧反智才滿足到？真係花少少心思寫好少少橋段都有反效果？製作特輯中，形容周潤發一換上賭神裝即時改變氣場的，是大陸長大的李宇春呀！然後，我努力說服自己，或者周潤發不想重覆高進呢，就似張家輝不想重覆化骨龍，不是人人也似劉華照唱《獨自去偷歡》而唔係唱《獨自去鳩鳴》。點知，拍落去，刀仔龍五乜都回歸。明明販賣《賭神》情意結，就似《X檔案》（The X Files）再拍過，《東京愛的故事》再畫過，偏偏王晶就要醜化及矮化自己廿六年前的經典，除了基於怠懶及過時及乾塘，也不知還可以怎樣解釋。
為配合大陸市場而低俗化也不是問題。我們看看羅拔迪尼路最新力作《Party無限耆》（Dirty Grandpa），羅拔迪尼路在電影中連J都打埋，一路狂講粗口、性取向歧視、種族歧視，比《醉爆伴郎團》（The Hangover）去得更盡。有乜所謂？扭扭橋，將所作所為解讀成爺爺對孫仔的教育，宣揚每個人也要堅守自己喜好的普世價值，立即變成《見習無限耆》（The Intern），龍虎豹當堂號外。換了第二個演員，未必有感染力，你用羅拔迪尼路，大家只可以鼓掌致敬，就係咁簡單。換句話說，石一堅瘋瘋癲癲白白痴痴也不是問題，有理由就得。兩套《賭神》，周潤發也演過智障，一套因為失憶，一套因為對亡妻守承諾。結局，正常返，大家就滿足。至少比現在滿足。也不奢望周潤發似羅拔迪尼路大智若愚，做個好心，可否不要讓周潤發如此大愚弱智。
MU38
sad and angry …..