硬要說《死侍：不死現身》（Deadpool）是破格超級英雄電影，好像有點不準確。首先，電影男主角，即係死侍，進行所有行動，全部為私利，包括為醫好絕症而自願被發掘異能，包括為執番靚個樣而導致交通阻塞，包括為拯救女友而執行私刑大開殺戒。惟一較接近傳統英雄定義的，只有留低一袋可卡因俾同屋主。如果說死侍跟蝙蝠俠、蜘蛛俠、美國隊長站在同一高度，門檻未免太闊。死侍都係英雄，咁過年要開工又有阿媽生的警察當然是英雄，有覺唔瞓冒被捕被打風險走去保衛小販檔的市民應該都係英雄，你係英雄，我係英雄。赤口也不會口角。
算不算破格也要研究。Sam Raimi版的《蜘蛛俠》（Spider-Man）(2002)開始深入探討超級英雄的心理和人性，到Christopher Nolan由《蝙蝠俠：俠影之謎》（Batman Begins）(2005)起推向極致，到《復仇者聯盟》（The Avengers）(2012）的大雜燴方程式。所謂的超級英雄，已經再無樣板化，世界觀亦不再是簡易的二分法非忠即奸。死侍身懷不死身但拒絕加入變種特攻行列做善事，狼人一開始時不是嗎？死侍好好打但把口好賤，鐵甲奇俠好有禮貌？死侍會突然之問同戲院內的觀眾有交流，周星馳在《整蠱專家》的一句「無厘頭！咁你又睇？」更直接。
對一般香港觀眾來說，《死侍》的最大問題不在意識。無人理會意識的，大家只理會行動。掟磚就一定係暴力。點解要掟磚？Who fucking care？打人嗰個一定唔啱，下令搞事嗰個可以走出來表示遺憾。搶你手袋必然犯法，搶你百幾億就係洗濕個頭一定要通過即係唔使搶要你雙手奉上。喺你面前拐帶，你會話有冇搞錯；喺你背後擄人，你會話唔關你事。一切只著重眼前畫面，要我們諗深一層都唔願意。所以，即使《死侍》的意識有幾不良，都不夠佢切開手臂值得列入三級。
《死侍》的最大問題，當然係包含太多美國流行文化，仲要係舊嘢。如果你只睇過Bruno Mars、Beyonce同Coldplay，無聽過Wham!；如果你冇睇過《教父》、《星戰》、《異形》，你好難明白點解在場有5%人會睇到笑。如果你是嗰5%，更慘，好像被歸了邊。而你很清楚，身為香港人，最安全是附和在主流之下。
不過，我仍然希望觀眾會留意三點：
(1)飾演死侍的Ryan Reynolds，2011年曾拍過好老正好似好保險的超級英雄電影《綠燈俠》（Green Lantern），找來上一輩的動作片導演Martin Campbell執導，一敗塗地，自此二人都一沉不振。死侍被推入實驗室前，大嗌唔好要我著緣色緊身衫，係明寸呢件瘀事。時代不斷演變，不要盲目以為昔日成功的一套，放在今日世界也必然成功。想成功？冒險試新試一試所謂的破格，可能更有保証。
(2)死侍不肯加入變種特攻，因為嫌X教授講太多耶穌，太過道德L。結局，代表老好人的Colossus一味勸死侍放下屠刀立地成佛，要原諒仇人先可以昇華去另一個層次。死侍睬你都有味，一槍射爆仇人個頭。全場興奮鼓掌。
(3)這真是一齣愛情電影。所有的仇恨，都是建基於愛。
hongkonger
說得非常好！去到盡頭，就要改變！進化！