0525-Kayu

《講鏟片》六周年，作為忠實讀者嘅我有咩感想呢？其實，睇見咁多才思敏捷嘅同業寫完，要講嘅讚嘅咩都講晒讚晒啦，我仲有乜寫？不如咁啦，我寫吓對《講鏟片》有咩不滿啦！


1. 嘥晒我啲時間：

唔知自己由幾時開始追《講鏟片》嘅文章。由最初得閒望兩眼，變成日日唔上過唔安樂，最衰你哋又唔淨係得影評，仲有戲院情報、電影宣傳、票房報告、影展，連戲院零食評介都撈埋，你知唔知一個電影工作者嘅時間係好寶貴㗎？以電影資訊引誘我減少工作時間，太過份喇……仲有你哋人肉Archive嘅程度，點解可以做到過時過節、或者梁振英講咗句Soundbite，你哋都可以Associate到十幾廿年前一部戲嘅？搞到日日有新料出，睇Post都好花時間㗎！

2. 令我選片入場嘅思維錯亂：

有時明明十萬個想睇某部戲，俾你哋鏟到體無完膚之後我決定慳返幾十蚊；有時某部戲擺到明係爛片之霸，但係經你哋枝筆凌遲完之後反而被片出一浸Cult味，搞到我囉囉孿好想入場睇。

3. 令我懷疑自己對電影嘅熱情：

正如《狂舞派》嗰句字幕：你可以為咗＿＿去到幾盡？你哋係用民建聯式日以繼夜夜以繼日嘅精神去包圍電影，真金白銀咁買飛掃晒大部份香港上畫嘅戲，真係去到好盡。好片，你哋為票房錦上添花、爛片，你哋令票房不至於零蚊收場，的確令到揀飲擇食嘅我有啲汗顏。
最後，我想表達對於網主人身安全嘅疑慮，如果網主因為大公無私嘅影評而導致有導演／監製／投資者去搵你尋仇嘅話，本人係唔會施以援手嘅，只會食花生。但係响呢一日來臨之前，我懇請《講鏟片》一眾死士繼續進擊，保衛高牆同時，仲要鼓舞大家出去同巨人對抗，搶返失去嘅領土。無論最後係凱旋而歸，定係壯烈犧牲，大家都算晌港鏟片呢片天空上面飛過吖，係咪？

「講。鏟。片」按：陳心遙畢業於香港中文大學，創作涵蓋多個影視層面。兩年前與導演黃修平合約電影公司「目前映畫」，該翁口 創業作為《狂舞派》，而他於片中身兼監製與編劇的角色。