某日，我跟家中不是粗口的老母說：「今年，唔會再去睇《賭城風雲》啦，真係頂唔順呀！」就算我在政治觀上支持王晶，也很難在審美觀上支持。
然後，我建議，不如看《家有囍事》吧。老母露出李香琴式表情：「年年都睇啦，有線電影一台唔播，翡翠台都播。」我知我知，就算所有電視台突然唔播，上YouTube都搵得到。「去戲院呀，用大約八十元港幣購買戲票，睇1992年的賀歲片呀！」
古怪嗎？可以說不古怪，因為亞視也在重播十幾年前的煙花直播和倒數活動。又可以說古怪，去HMV用三十元購入一張DVD，一家大細三十幾人連睇七次都得。又可以說不古怪，電影節經常重播昔日經典，一票難求也是尋常事。又可以說古怪，古怪在本來是片主黃百鳴在自己的戲院獨家放映，話咁快已經吸引其他院線加入聯盟。勁過場場爆滿的《十年》。
究竟有冇人真係會去睇？肯定有，為數不會少。那些什麼七、八十後集體回憶呀，九十、千禧後終於有機會入戲院欣賞呀，種種理由也多餘，講到底，其實最重要宣示不滿。《美人魚》是拍給大陸人看的，《賭城風雲》是賤價販賣香港的輝煌。明明大陸人都係睇我們的周潤發、周星馳大，係咪真係有人覺得今日的周潤發、周星馳更合心水？我非常懷疑。真正香港人就完全不用懷疑，肯定愈睇只會愈嬲。香港人的電影口味，跟香港人其他的要求一樣，在今年被正式地完全無視。樓買唔到，維基電視台睇唔到，沒有連鎖店的商場搵唔到，住開的村落留唔到，沒有用的天價交通工具就阻止唔到。有現在式的周潤發加周星馳加劉德華加張學友加張家輝加郭富城賀歲，如果還有市民真金白銀購票觀看之前睇過十次以上的殖民地時期張國榮，總算是一㮔抗議，即使抗議得很悲哀。
如果，電影收得，証明這種近乎無本生利的營商手法有市場，不妨再接再厲。推薦各大片主可考慮深受香港年輕人歡迎的舊作。包括同樣由高志森導演執導，講中港矛盾的《合家歡》（1989）、講香港人為逃避九七而不惜去加拿大做二等公民的《富貴再三逼人》（1989）。想重溫王晶大導演舊作的話，推介《專釣大鱷》（1989)、《精裝追女仔之3狼之一族》（1989)。個人最愛則是周星馳的《國產凌凌漆》（1994)。如果有戲院肯重演以上可一不可再的港產喜劇，我肯定入場。
Piy
加拿大做二等公民係《富貴再逼人》，第二集
《富貴再三逼人》已經返回香港
Sylvian
yes
YSK
其實，黃百鳴、高志森之流是反佔中的。講完。