有老本食的話，人人爭住食。想食得有型，真係要向史泰龍（Sylvester Stallone）學習。十年前，拍動作片唔掂，拍科幻片唔掂，拍喜劇唔掂，他臨老走去拍《洛奇：拳王再臨》（Rocky Balboa），第六集，仍然上擂台。再整多套《Rambo：熱血回歸》（Rambo），中年男人打極唔死的自我肯定。奠定之後《轟天勇將》（The Expendables）系列，以大佬身份集合一眾動作片明星，主打懷舊硬橋硬馬。又玩幾年。以為老本食到七七八八，他又拍番《洛奇外傳：王者之後》（Creed），企後一級，講承傳，分分鐘連奧斯卡的演員獎都攞埋。佩服。
故事是一貫拳擊片的鋪排，初出道無名小子，挑戰世界第一。唔係咁，可以點啫？勝在與時並進。不是話改用iPad睇YouTube拳擊片之類啦，是指觀念追得上社會變化。即是貼地。阿波羅之子不再是街頭古惑仔，窮到無錢開飯，要靠打拳才生存到，被迫。他本身是基金佬，身光頸靚，揸靚車住大屋。打拳，為滿足心靈需要，像使命，或宿命。洛奇也接受現實，會倒下，會知道有些事不能勉強，不再一味日漫式鬥志鬥志鬥志。你話龍哥的演技是否突飛猛進，不常移動的面部肌肉突然識郁？我只能答你：最緊要搵到適合的角色。你看飾演洛奇師父的Tony Burton，現實中，剛剛病逝，對照電影中洛奇不停提及時間最折磨人、重視的人通通不在，那份唏噓，臉上的皺紋已經是演技。
最貼地的，還是片名。Apollo Creed的Creed。血緣主宰一切。電影當然會講到阿波羅個私生子有拳擊天份，又有誠意，操練又摶命，人品仲唔錯。但你始終不能避開世界第一的一句：「如果你冇你個老豆，你根本無可能同我打呀？」咁又啱喎。如果佢唔姓Creed，洛奇唔會因為佢靚仔而出山教拳。如果佢唔姓Creed，唔會打贏普通賽事便成為明星。如果佢唔姓Creed，唔會有觀眾唔會有贊助商就算有都唔會即刻有。這就是《洛奇外傳》與《洛奇》的分別。這就是三十年來的分別。活在父親陰影？比其他人背負更大壓力？多餘，你咪又係感恩有呢個從未見過一面的老豆？讓你更難過是，找來Michael B Jordan做主角。DNA出錯，比老豆細粒得多，原來都無所謂。永遠不會追到陳瀅的你，羡慕嗎？
par ker
永遠不會追到陳瀅的你，羡慕嗎？
hahaha