十年專題 – 杜汶澤

由於大家比較喜歡將我同本土掛鈎，而就於呢件事我又唔係特別討厭，所以呢篇嘢我就用咗廣東話嚟寫。

話曬都叫講鏟片十年，我當然要用港產片嘅語言。

我九三年入行，九九年拍第一部電影，之後，就無再做過其他行業。除咗電影同飲食業，其實唔係咁多行業會有所謂嘅「評論」。你有無見過醫生律師有人寫評論吖？

「雖然個官判咗我坐廿八年，但係我覺得我個律師剛柔並重、口才了得，不愧為法律界嘅典範……」

「佢果刀劏落去力度適中、位置準繩，遍遍呢個 moment ，佢電話又響……」

連呢啲牽涉人命同公義嘅嘢都無人寫評，咁你話人類啊係幾咁着重食飯同睇戲吖！

以我個人認為，寫影評係比寫食評係更加偉大嘅！因為寫食評，如果你出名，你可以恃住自己出名而周圍呃飲呃食，但係寫影評就只能得到一份稿費。

所以業餘影評就更加值得令人尊敬。

尤其是嗰啲，甘願赴湯蹈火，去睇一啲垃圾片，再同觀眾分享感受嘅人，就更加令我佩服得五體投地！

講鏟片嘅作者就係屬於呢種。

最近我主持飲食節目，其中有一個「劣食」環節，搜羅全香港九龍新界，出名難食嘅野，推介比觀眾，以免大家中伏，有一次我響旺角，試左一粒海膽芝士焗蘑菇，我頂你個肺，粒蘑菇就鯹嘅，海膽就臭嘅，芝士就酸嘅，條喉嚨好似比人灌屎咁！響嗰個 moment ，我諗起講鏟片果篇2017年1月1號出嘅「2016十大港產爛片推介」，我終於明白到，作者係幾咁痛苦，幾咁難受！

我食咗臭海膽，最多痾啫，佢食咗十嚿屎喎！咁都仲有命？

而且！仲做咗十年！

我响呢度，以觀眾嘅身份，不單止恭喜講鏟片十周年生日快樂，更代表廣大嘅觀眾，向講鏟片致以最崇高的敬禮！

而作為電影人嘅我，亦會用最謙卑嘅態度嚟警惕自己，雖然我才華未夠，未能拍出任何經典作品，但至少唔好拍嚿屎出嚟。

但願如此。

「講。鏟。片」按：杜汶澤，香港演員，從亞洲電視開始，九九年拍下首部電影《屍氣逼人》，曾一段時間於大量電影演出，當中代表作包括《無間道》的傻強、《人間喜劇》的司徒春運、《低俗喜劇》的杜惠彰等，近年同樣參與幕後製作，當中監製電影包括《伊莎貝拉》、《前度》、《雛妓》與《選老坐》，並參與導演與編劇等崗位，新作《空手道》他同時參與出品人、監製、導演、編劇、演員及動作指導六個崗位。

講鏟片十年專題