十年專題 – 黃浩然：由《電影雙周刊》到《明月幾時有》

好多謝約稿，慶祝講鏟片十周年。一直想借今次機會，想當年講《電影雙周刊》：一來今時今日，好多圈中人，當日都來自同一本雜誌，同一個時代，一個要去試片室睇試戲時代；二來香港實在需要一個專業電影媒介，因為傳統紙媒只有娛樂版，稍為認真報導電影，就變成文化版，放落副刊。可惜，可能一直想寫，實在太想寫，結果遲遲未能開始落筆寫，遲遲未能交稿。

最後人在南韓，我先忽然醒起，既然想香港再有一個電影媒介，認真報導電影，負起責任教育下一代認識電影，不如就由自己做起，以身作則，為講鏟片做現場報導。如果香港電影衰落，同《電影雙周刊》衰落同步；我希望大家一齊做好香港電影媒介，最終亦可以同步做好香港電影。

今次去首爾，前後六日，最後一晚，我去到市中心鍾路三街地鐵站附近，一間專播獨立電影之戲院。據聞南韓首都有四間戲院，主力播藝術電影，以今次一間最死硬派，今個月就舉行法國新浪潮電影中堅導演伊力盧馬回顧展，請到盧馬電影生涯中後期御用剪接雪蓮（又名雪美蓮）擔任嘉賓，一連四晚出席映後談。

近一個月，雪蓮一直在香港，中間去過新加坡主講紀錄片大師班，又擔任香港國際電影節紀錄片評審，香港電影資料館又有特備節目播放雪蓮昔日短片，更加出席香港大學紀錄片講座，不過香港主流傳媒完未有報導。今晚映後談，雪蓮開宗明義，最喜歡去亞洲講電影，因為睇見英文名瑪莉史堤芬，絕大部份影迷都以為白人剪接，從來未有想過，眼前會出現一位亞洲人。

其實雪蓮香港土生土長，大坑真光女校讀中學期間，已經有學法文，又幫《年青人周報》寫英文稿，後來家人因六七暴動而決定移民加拿大魁北克，不過雪蓮並未適應新生活，就選擇去巴黎讀大學。當時七十年代，雪蓮只想拍電影，對理論堂零興趣，而伊力盧馬正正教實戰拍攝，所以只會上盧馬課堂。

有一堂，盧馬教電影製作財政預算，正正雪蓮即將要開拍短片，落堂之後就硬闖盧馬辦公室，想攞更多資料，點知被盧馬秘書檔架。不過返到屋企，電話已經響起，原來盧馬親自叫雪蓮，想攞資料就即刻再行多轉。其實以上故事，有關雪蓮與盧馬最初點認識，香港電影資料館特備節目座談會，雪蓮都有向主持羅卡以至現場觀眾披露過。

雪蓮回憶，盧馬只喜歡同年青人合作，覺得專業人材已經被污染；而且合作開就繼續合作，拍攝小隊好似一家人，拍攝以外時間都經常見面。開拍《夏天的故事》之前，盧馬前作叫做有些少電視資金，製作規模相對比較大，可惜效果未見得好；所以當雪蓮聯同一班同學拍短片，盧馬去探班，就話好羨慕雪蓮零資金用打游擊拍攝方法，亦確定盧馬之後製作規模。

以《夏天的故事》為例，盧馬導演，雪蓮助手，攝影師加兩個助手，其中一個主力推軌，收音亦有兩個人，其中一個主力揸咪，另加一個打雜一腳踢，前後只有八個人。電影裡面好多沙灘場面，加埋兩個主角，台前幕後亦不過十個人，而盧馬通常企到老遠，舉起右手，兩雙手指轉轉，就開機拍攝，非常簡約，無聲無息。如果有人多問，就話自己大學教授，正進行學生製作，又或者叫雪蓮攞出加拿大護照，話外國攝製隊拍緊紀錄片之類。

其實以上內容，好過癮，好有意思，影迷一定有興趣聽，可惜主流傳媒完全零報導。雪蓮最新剪接作品《明月幾時有》由許鞍華導演，應該暑假公映，又似乎會押後，不過兩位第一次合作，基本上已經非常遲發生，因為兩位第一次認識，其實早到八十年代初。當年許鞍華完成《投奔怒海》，到法國康城賣片，遇上雪蓮亦正為自己短片找尋出路，大家惺惺相惜，不過正式合作，竟然要等多三十幾年。

至於我自己第二部電影《逆向誘拐》，同第一部戲《點對點》一樣，最後一稿都交由雪蓮負責剪接，整個後期製作希望可以今年暑假結束之前完成。最後，我想用雪蓮於首爾第一晚映後談一段分享作結：當時正回答現場提問，有關歧視，雪蓮用肯定語氣講，做人最忌當自己做受害人，覺得自己身為女人，條路特別難行，自己身為華人，條路又特別難行，其實無論如何，條路都一定難行，所以點都要盡做，甚至將性別種族問題，扭轉到變成自己優勢。共勉之。

黃浩然
1990年 第一次兼職《電影雙周刊》
1991年 第一次考入香港演藝學院
1993年 第一次大專畢業主修電影電視
1994年 第一次辭職由有線轉投亞視
1995年 第一次擔任場記完成電影拍攝
1997年 第一次到康城影展採訪
1998年 第一次簽電影導演合約
1999年 第一次導演電視紀錄片
2001年 第一次導演電視單元劇
2003年 第一次參加釜山電影節創投會
2005年 第一次多碩士畢業主修多媒體
2006年 第一次入圍香港獨立短片及錄像比賽
2011年 第一次編劇作品成功拍成電影
2012年 第一次獲得香港藝術發展局資助
2013年 第一次自編自導電影《點對點》
2014年 第一次加入大學全職教電影
2015年 第一次獲得香港電影金像獎提名
2016年 第一次獲香港電影發展基金資助
2017年 第一次為講鏟片寫稿
寫於首爾返回香港上空

講鏟片十年專題