正當安樂與娛藝旗下的百老匯、Palace、AMC及UA戲院以「環保」為名，於九月十六日起取消借用3D眼鏡，要求沒自行帶了3D眼鏡觀眾需要以六元即場購買3D眼鏡之際，沒有參與計劃的嘉禾與MCL院線也特別表明仍繼續可借用安排。當中嘉禾強調在售賣眼鏡之餘，「繼續提供清潔消毒的3D眼鏡」借用。
不過，說得最為「入肉」的，還是MCL院線。
上圖所見，便是近日於MCL旗下戲院張貼的通告，標明「免費借用3D眼鏡 隨時睇戲 唔駛預備」，明顯地衝著百老匯與UA等戲院近期要求觀眾準備3D眼鏡看3D電影免收眼鏡費的立場，更語帶相關將「3D」寫成「Free D」，意味著觀眾在MCL戲院看立體電影相對較為「自由」。
除了擺明去「串人」以外，也同時提供新的優惠，於年底前在該院購買3D電影戲票兩張，可獲雙人套餐十元優惠券。
其實售賣3D眼鏡不是問題，因為的確有觀眾希望可以帶備自己的3D眼鏡，感覺較為放心。不過，戲院在售賣3D眼鏡之餘，卻不再提供眼鏡借用，要求觀眾付款購買之餘又不減票價，便是歛財的方法，難怪MCL院線可以藉此來個擺明針對的宣傳。
比你誅
「Free D」依句真係中正要害,好多時睇戲都係即興的, 邊個會經常帶住個3d眼鏡 ?
以後如果要睇3d戲, 我會去MCL,嘉禾,IMAX 或者 the Grand.
Lawrence
係啦, 我又唔隋身帶袋既, 同埋我覺得嘉禾既3D睇得最舒服, 對眼冇咁攰
前放映員
出師要有名，掠你水都會揾個懶堂皇既藉口。好左香港唔係俾果兩個院線壟斷，如果唔係就真係有排俾佢地掠。幫襯開UA都係咁講，唉……..
hin
係略嫌早場唔平
P仔
極是,仲要逼人局住買眼鏡,買完又要丟,咪又係唔環保
molittlemo
咪係..
我個晚係APM睇3D食人魚..
去到先知要買..咁焗買啦..
問題係..咁我以後咪都要帶係身?
好多時睇戲都係返左工先同d friend講起.
唔通下下返屋企囉?
小明哥
嘉禾依家做法最好,駛咩買!戲飛都貴左啦,洗下派下眼鏡都懶?
70mm negative film
百老匯、Palace、AMC及UA戲又係o個句:
一定要賺到盡 !
衛生
D眼鏡之前都唔知比咩人用過,我就寧願比錢買新眼鏡,最少唔會有衛生問題先啦.用二手眼鏡睇完之後如果對眼有事,比錢睇眼科醫生咪仲貴.
而買咗眼鏡之後,如果自已又丟咗而又要買過,咁應該個人問題,而唔係環保問題喎!
版主及大家好似只係彈而家要比錢買眼鏡,又唔見讚吓佢哋之前送眼鏡比客人…
3D仔
3D電影已經成為一個熱潮了!!!能夠繼續提供清潔消毒的3D眼鏡借用的確是件好事呢.!!!!!!!
donald
送眼鏡只係宣傳黎姐
一副眼鏡值得幾多錢
佢送亦只係送2個月
但係賣眼鏡係十年,廿年,卅年
你認為佢真係咁有良心咩
如果佢地咁樣話d眼鏡衛生問題以唔借
咁係咪戲院既問題??
Daviddave
很多港人都很喜歡和支持3D電影，就算是要付六元亦不覺得是一個問題，我亦是!
bigming
你估人地只係洗眼鏡而唔使做其他野架？你試下去做丫，你去洗丫。
衛生
眼鏡紿終係比較貼身的個人用品,唔會借用亦容易理解.
免費送眼鏡都已經有2個月,仲要係於暑假期間送.如果真係要”歛財”點解唔於暑假期間就開始收費?
理論上每個客人只需要買1副眼鏡就可以循環使用.就算”歛財”都只係比一次錢.咁當然自已唔準備眼鏡而又要睇3D電影,令到自己要比錢再買眼鏡的話,因而責怪戲院的話,我就覺得對戲院方面有D唔公平.從我角度來看就唔覺得院方冇良心囉.
Ryan
先要理解問題的本質.
首先, 電影播放3D電影, 理論上戲院需購入的包括器材, 當中3D眼鏡是其中一部份. 而播放3D電影同時使用器材, 也需要使用3D眼鏡.
觀眾在觀影過程, 需要使用3D眼鏡去看3D電影也是一個事實.
先要談戲院派發3D眼鏡的事, 這是在暑期發生的事, 但大前題是, 你要先行入場看那段時間的3D電影, 方會獲發3D眼鏡.
好了, 對於該段時間不入場看3D電影的觀眾, 現在到百老匯及UA旗下戲院看3D電影, 一樣的票價, 為何戲院不提供租賃眼鏡的服務, 只是要求觀眾購買眼鏡? 若果只要求衛生, 像嘉禾般售賣眼鏡的同時, 也繼續提供借用服務便可.
問題的本質是, 何以戲院不提供借用3D眼鏡服務呢? 嫌不夠衛生, 觀眾可選擇自擕眼鏡, 這其實沒有甚麼問題.
「自行準備3D電影」概念, 基本將戲院本應準備全部觀眾器材的責任, 部份轉接移至觀眾身上. 觀眾觀眾習慣不一定有所準備, 現時針對的是, 為何不提供借用服務, 只提供要求觀眾付錢購買眼鏡.
Lawrence
咁票價收貴咁多為咩, 收入高左, 好自然要請多1-2個人應付多左既工作, 咁都唔明? 責任完全唔係觀眾度的。
比你誅
嘩, 你又學特首/成龍咁代表港人說話? XDDDD
Casgoog
付了六元的價錢其實對經濟亦有一定的剌激作用，算是做了一件好事。
bigming
細路，你覺得開戲院ｄ老闆賺多左錢就一定要請多個人架喇。
Lawrence
係, 冇錯, 你話戲院STAFF辛苦，WORKLOAD亦都大左，但係觀眾亦都要俾多$30-$40一套戲, 所以成個PROJECT都係錢字當頭, 一件認為理所當然既事, 並不代表係啱，人大左, 就要學識分辨對與錯‧
小明哥
你都痴痴地,我冇端端做咩走去洗眼鏡?
3D戲收入多左,請多個員工洗眼鏡都請唔起呀?
你去食飯洗唔洗幫人洗埋碗先走呀?
路過
其實明買明賣既姐,香港既精明消費者懂得選擇咪ok囉,每間公司有自己既一套做法,唔滿意某d戲院既咪唔好去個度睇戲囉,抱不平亦改變唔到d咩,每個推廣都一定有好與壞,肯定冇可能滿足所有既客人,至於3D加價,當然需要啦,人地開公司投資左既器材,唔通用返普通票價咩,比起未流行3D電影個時已經平左啦, 個時咁貴一樣有咁多人睇, 覺得貴既咪去D票價較低既戲院囉, 冇人迫你要去個d你地所謂”歛財”既戲院度睇架